أخواني وأخواتي الأعزاء ...هاي بعض من ابيات الشعر الشعبي من ألأبوذية والزهيري
قلم قلبي تداين ورقة منك....
لأن ماكو بجمالك وأرقة منك.....
أسجلك انت ألأول وأرقمنـــك........
وأكتب لافتة محجوز الية...............
ــــــــــــــــــــــــــــــــــــــــــــــــــ ــــــــــــــــ
وحق صفين والخندق وحطين.....
أملخ الراس بفراكك وأحط طين....
أطير من الفرح صدّك وأحطن..........
أذا فد يوم رقمك دك علية.................
ــــــــــــــــــــــــــــــــــــــــــــــــــ ـــــــــــــــــ
أحبك من صغر عودي وسني.......
ومن حبك وكع شعري وسني.........
على حالي بجة شيعي وسني............
وثالثهم تركماني يوّن علية................
ــــــــــــــــــــــــــــــــــــــــــــــــــ ـــــــــــــــــــــ
ذهب صافي طبعنة ماصدينة.......
وأبد عن النحبهم ما صدينة..........
نصيد للناس كلهة وما صدينة.............
رغم نفس المكان نذب سوية................
ــــــــــــــــــــــــــــــــــــــــــــــــــ ـــــــــــــــــــــ
(((وأليكم الــ(زنجيل) من الابيات المتصلة..
عشرتك روحي صدّك ماتملها..
وعلي ايام سَعدك ماتملها.....
أريد انصب انا لروحي مأتم ألها....
واشوفك هم تجي وتبجي علية؟
لومرة تمر مثل الشماتة...
وانا العايش بهجرك والشماتة....
علي مغرور كالولي شماتة...
صحيح بشامتك تنغر علية؟
لوتعرفني أحبك واشتمنك
لأن منطي للواشي وشتة منك
اني اليوم احضننك واشتمنك
واشوفك هم تجي وتشأل علية؟
لو رأساً تكلي ارجوك هدنة.....
وتعاركني وتريد النوب هُدنة....
ولك والله العشك وياك هَدنة.....
مريض آنة تعال اسأل علية..
وشوف شلون حالي من تسلني..
وعلي صدك سيف هجرك من تسلني...
شكل عنك الشامت من يسلني؟..
حيازة وحمل سلمتك بيدية؟؟؟
ــــــــــــــــــــــــــــــــــــــــــــــــــ ــــــــــــــــــــــــــــ
وأليكم بعض من ابيات (الزهيري)
حطني اعلى جفنك كحل واعلة الشعر ماشة لك
كافي زعل ياترف طبع الزعـــــــــــــــــل موش الك
باجر ادزن هــــــــــــــــــلي وكل العِرِف مشاية لك
بلكي تحـــــــــــن وتـــــــــجي قلبي تراهُ نَحَل
ونتعاون اعلة الوكـــــــت كومة مشاكل نِحِل
ونعيش انـــــــتة وأنــــــــة اثنين بخلية نَحِل
والملك انت الملك وكـــــــــــــل الامر ماشي لك
ــــــــــــــــــــــــــــــــــــــــــــــــــ ــــــــــــــــــــــــــــــــــــــــ
(((خاص لمعتقلينا في سجون الاحتلال بضمنهم أخي سيف)))
العفو الاصدر تو يحلو الطول شاملكم
أنكم اكرام النفس والطيب شيمة الكم
أصحاب نخوة وعزم وخشوم شم الكم
وراحات جفي الدمع لفراككم مليت
وياما زهيري على سطور الورق مليت
ضنكم بطول البعد من شوفكم مليت؟
أنتوا بمكان النفس بس كللي شيملكم
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــ
الى من يريد ان يتوب الى الله العلي القدير...
أركان الاسلام تبدي وية السُنَن فاتحة
ومادام باب القلب بس للصدك فاتحة
يل تيد ترضي الأله بتوبتك فاتحة
ومن تيد تمشي بسفاهة ومحاسن تَرِك
الدين مابي نسب اعراب فرس وتُرُك
الماسعة بدنيتة وأعمال زينة ترك
ماتنفعة من الخلك يوم الدفن فاتحة
وسلامتكـــــــــــــــــــــــــــــــــــــــــــ ـــم